यस ब्रह्माण्डको कहाँ पुगेर अन्त्य भएको छ ? भन्ने तथ्य अहिलेसम्म कहिँ पनि फेला पर्न सकेको छैन ! यो विषय रहस्यमय बन्न पुगेको छ ! खगोल र भूगोलमा अवस्थित ग्रह,नक्षत्र,तारा,सुर्य,चन्द्रमा,समुन्द्र,पर्वत,लोकालोक,आकाश,वायु,जलआदि तत्वहरु को द्वारा रचना गरियो ? यी र यस्ता हज्जारौं प्रश्नहरुको एउटै उत्तर नै योगेश्वर श्रीकृष्ण हुनुहुन्छ !
मया$ध्यक्षेण प्रकृति: सुयते सचराचरम !
हेतुना$नेन कौन्तेय जगद्विपरिवर्तते !!
गिता ९/१०
यो भौतिक जगतको (कार्यकारी) अध्यक्ष नै श्रीकृष्ण हुनुहुन्छ ! अनेकौं दैविक प्रकोपहरुको कारण पनि श्रीकृष्ण नै हुनुहुन्छ !
पृथ्वीमा जन्म लिने हर प्राणीहरुले बाच्नको लागि प्रकृतिको सहारा लिनुपर्छ ! हाम्रो शरीर पन्चतत्व ( पन्चमहाभुत ) सङ्ग सम्बन्धित छ ! यी महाभुत पनि श्रीकृष्णकै अधिनमा छन !
यथा महान्ति भूतानि भूतेषुच्चावचेष्वनु !
प्रविष्टान्यप्रविष्टानि तथा तेषु न तेष्वहम !!
भा.२/९/३४
यो सारा ब्रह्माण्ड श्रीकृष्णकै अधिनमा छ ! यसभित्र रहने सम्पुर्ण मानव प्राणीहरु पनि उहाँकै अधिनमा छौँ !
सो$हं विश्वसृजं विश्वमविश्वम विश्ववेदसम !
विश्वात्मानमजं ब्रह्मा प्रणतो$स्मि परं पदम !!
भा. ८/३/२६
श्रीकृष्ण विश्वरुप हुनुहुन्छ अर्थात् विश्व नै उहाँकै स्वरुप हो ! जहिलेसम्म भगवान श्रीकृष्ण खुशी रहनुहुन्छ तबसम्म यो ब्रह्माण्ड रहन्छ अनि यहाँ रहने सम्पुर्ण मानीसहरु खुशी रहन्छन ! उहाँलाई जसले दुखी बनाउँछ उ कहिल्यै खुशी रहन सक्दैन ! संसारलाई खुशी राख्न श्रीकृष्णलाई प्रसन्न बनाउनु पर्छ !
हाम्रो पुर्वीय दर्शन , वेद शास्त्र र अध्यात्म ज्ञानले श्रीकृष्णलाई खुशी तुल्याउन सत्य, प्रेम, दया, करुणा, स्वधर्मपालन, स्वाध्ययन, आत्मचिन्तन, शास्त्रचिन्तन, सेवादी जस्ता सदाचारको पालना गर्नुपर्छ भनेर बताएका छन !
''श्रीकृष्ण जन्माष्टमि'' श्रीकृष्णजिको सबैभन्दा प्रिय दिन हो ! यो दिनमा सम्पुर्ण मानव समुदायमा उहाँको दृष्टि पर्ने भएकाले ज-जसले उहाँको नाममा व्रतोपासना, भजन-कीर्तन , सत्सङ्ग, प्रवचन श्रवण, भागवतको दशम:स्कन्ध: पाठ पारायण गर्दछन भने उनीहरुलाई अलौकिक भक्ती प्राप्ति हुन्छ ! भक्ती यस्तो तत्व हो जसमा ब्रह्माण्डको सम्पुर्ण सुख-शान्ति यसैमा विद्यमान रहेकोे हुन्छ !
'' सर्वाङ्ग कर शान्ति इति कृष्ण ''
कृष्णको अर्थ कालो र आकर्षक हो !
जस्तै कालो रङभित्र सम्पुर्ण रङहरु हराउँछ, त्यस्तै कृष्णभित्र संसारकै खुशीका रङ्गहरु लुकेर बसेको छ !
यस दिन उपासना गर्ने भक्तहरुलाइ भगवान श्रीकृष्णजिले सुख,शान्ति,खुशी,भाग्य,आयु,यश,कृति,विद्या,धन,ऐश्वर्य,पद-प्रतिस्ठा प्रदान गर्नुहुन्छ ! सम्पुर्ण आध्यात्मिक,दैविक र भौतिक ताप हरुलाई नस्ट पार्नुहुन्छ !
''श्रीकृष्ण जन्माष्टमी'' सिमित भूगोल र समुदायको मात्रै नभै चराचर जगतका मानव,पशुपंक्षि, जीव-जनावर, सरिसृप,तृण लगायतका भगवानका सृष्टिभित्र पर्ने सम्पुर्णको साझा सास्कृतिक पर्व हो !
यस दिन व्रतोपासना , भजन-किर्तन गर्नाले विद्यार्थीहरुलाई विद्या , निर्धनहरुलाई धन , निसन्तान दम्पतीहरुलाई सन्तान , व्यापारीको वाणिज्य वृद्धि , नारीहरुलाई सौभाग्य , दम्पतीमा प्रेम , घरपरिवारमा सुख शान्ति र समृद्धि प्राप्ति हुन्छ !
यस दिन सकेसम्म धेरै भन्दा धेरै बालबालिकालाई सहभागी गराइ उनैद्वारा पुजा , आराधना , बन्दना , स्तुति गर्न लगाउनु पर्दछ ! जसले गर्दा उनीहरूमा नैतिक संस्कार , क्षमता , दक्षता, तार्किक शक्ति , भक्ती,प्रेम,करुणा जस्ता सदगुणको विकास हुन्छ !
"श्रीकृष्ण जन्माष्टमी'' हिन्दु सनातानीले मात्रै नभै सम्पुर्ण विश्व समुदायले मनाउन आवस्यक पर्व हो ! यस किसिमको महिमालाइ स्वीकार गर्ने , अपनाउने हरकोही मानीसहरुमा उर्जा , सकारात्मक सोच , निर्णायक क्षमताको वृद्धि र
"वसुधैव कुटुम्बकम"
अर्थात् यो पुरै विश्व मानव समुदायका मानवहरु हाम्रा आफन्त हुन !
" दया सर्वत्र कर्तव्या" सबैप्रती दया राख्नु मेरो कर्तव्य हो भन्ने भावको बोध गराउँछ !
समुदायलाई आध्यात्मिक , नैतिकवान , चरित्रवान बनाइ सिङ्गो विश्वमै शान्ति स्थापना गराउन उत्प्रेरित गर्ने दिन नै "श्रीकृष्ण जन्माष्टमी" हो !
🙏राधे राधे🙏
🌹जय श्रीकृष्ण🌹
व्यासाचार्य भुवन गुरु ज्यु!
Vyasacharya Bhuwan Guru
